الفسطاط

Coordinates: 30°00′N 31°14′E / 30.000°N 31.233°E / 30.000; 31.233

الفسطاط مدينه بناها عمرو بن العاص فى مصر حوالى سنة 641. تاريخ بنا الفسطاط مش متفق عليه فبيقول البلازدرى انه بدأ بعد استيلاء العرب على بابليون ، لكن غالبية المؤرخين بيقولو انه ابتدا بعد الاستيلاء على اسكندريه. الفسطاط فضلت عاصمة مصر لغاية سنة 750 لما غزا العباسيين مصر ، و بعد العباسيين مادمرو العاصمه القطائع اللى بناها احمد بن طولون بقت الفسطاط عاصمه تانى من 904 ل 969 لما بنى الفاطميين مدينة القاهره. اتعرفت الفسطاط كمان بإسم " مصر " .

ابتدت الفسطاط فى اقصى جنوب الضفه الشرقيه للقاهره الحاليه شمال مدينة بابليون عاصمة مصر التانيه بعد اسكندريه و مقر الحكم البيزنطى. ساعد على اختيار الموقع وجود بركة الحبش فى جنوب حصن بابليون. و من القصص الخياليه انها اتسمت بالفسطاط لإنها اتأسست حوالين فسطاط ( يعنى خيمه ) عمرو بن العاص و ان يمامه بريه عششت عليها و باضت و افرخت عليها. الحكايه الخرافيه دى فضلت متداوله لغاية ما اكتشفت برديه مكتوبه باليونانى و العربى بينت العلاقه بين كلمة " الفسطاط " العربيه و كلمة " فوساتون " اليونانيه Phossaton اللى معناها " المعسكر " اللى حواليه خندق و فى اللاتينى " فاستين " Fassatin.

كلف عمرو بن العاص كذا واحد بالاشراف على البنا و بيقول البلاذرى ان الزبير بن العوام هو اللى اختط مدينة الفسطاط. و بيقول المقريزى ان موقع الفسطاط اللى بقى اسمها " مدينة مصر "كانت فضا و مزارع ما بين النيل و الجبل الشرقى المعروف بإسم المقطم. و ما كانش فى المنطقه حاجه غير حصن بقى بيتعرف بإسم " قصر الشمع " ( و هو حصن بابليون ) و المعلقه.

تاريخ الفسطاط مش متفق عليه فالبلاذرى بيقول ان الفسطاط اتبنت بعد الاستيلاء على بابليون ، لكن معظم المؤرخين بيجمعو على ان بناها تم بعد الاستيلاء على اسكندريه. و موقع الفسطاط كان بيحميها من الهجمات حيث انها كانت بتمتد فى اضيق منطقه فى الوادى ما بين النيل و جبل المقطم و زادت حصانتها عن طريق حصن الجيزه فى غرب النيل و بقايا حصن نابليون ، و كان الاتصال متيسر بين شطين النيل عن طريق كوبريين كانو بيوصلو مابين الفسطاط و الضفه الشرقيه و جزيرة الروضه و مابين جزيرة الروضه و حصن الجيزه.

الفسطاط فضلت العاصمه السياسيه لمصر لغاية ما بنى العباسيين مقر جديد لحكمهم هو مدينة العسكر فى نص القرن التامن الميلادى و من بعدهم بنى الطولونيين مدينة القطائع.

الفسطاط كانت مركز نقل و عبور بين الدلتا و الوادى عن طريق كوبرى كان بيربط الفسطاط بالجيزه عبر جزيرة الروضه ، و الحركه النهريه بين شمال مصر و جنوبها و اذدهرت مينا المدينه تجارياً اكمنها كانت المينا الوحيده فى المدينه و كان المينا فيه جمرك التجاره المنقوله بالجمال من الطور للنيل و من هناك بالمراكب للفسطاط. حوالين الفسطاط اتجمعت اسواق فى الميدان اللى حوالين جامع عمرو بن العاص و كان من اشهرها سوق القناديل و حكى الرحاله ناصر خسرو ان السوق ده ماكانش ليه مثيل حيث ان كان بيتباع فيه كل الطرائف الموجوده فى العالم.

كليبر جيه قدر عدد سكان الفسطاط بحوالى 850 الف ، و قدر طولها من الشمال للجنوب بحوالى 4.8 كم. على بهجت عدل تقديرات المقريزى بعد ما عمل حفريات فى الفسطاط و قال ان حدها الشمالى كان بين كوم الجارح بطول 1439 متر ، و حدها الجنوبى كان بين الرصد و شط النيل فى الغرب بطول 1943 متر ، و حدها الغربى كان طوله 2262 متر على شط النيل اليمين ، و حدها الشرقى كان بيمتد لغاية حدود القرافه الحاليه و بيتجه على الجنوب لغاية الرصد. و بكده اتقدرت مساحة مدينة الفسطاط بحوالى 3.353 متر مكعب.

اتسعت الفسطاط و فاقت مدن كتيره فى الشرق و بيقول القضاعى ان كان فيها 800 شارع و 1700 حمام و هى ارقام فيها مبالغه لكن بتعكس حالة ازدهار المدينه العمرانى.

كشفت الحفريات ان مدينة الفسطاط كان فيها شبكة صرف صحى الجزء الغربى كان بيصرف على النيل و الجزء الشرقى كان بيصرف فى مستودعات منقوره الجبل.

شوف كمان
قبلها
عواصم مصر
بعدها
اسكندريه من ح.641 - ل 750 و من 904 ل 969 العسكر

مصادر

  • جمال الدين الشيال (استاذ التاريخ الاسلامي): تاريخ مصر الاسلامية ( جزئين )، دار المعارف، القاهرة 1966.
  • حسن الرزاز ، عواصم مصر ، دار الشعب، القاهرة 1995
  • المقريزى : المواعظ و الاعتبار بذكر الخطط والأثار، مطبعة الادب، القاهرة 1968.
  • على مبارك ، الخطط التوفيقية الجديدة لمصر والقاهرة، المطبعه الاميريه ، بولاق 1306هـ
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.