Uga

Uga

Ugas negras
Clasificación scientifica
Reino:Plantae
División:Magnoliophyta
Clase:Magnoliopsida
Orden:Vitales
Familia:Vitaceae
Chenero:Vitis
Especies

Vitis acerifolia
Vitis aestivalis
Vitis amurensis
Vitis arizonica
Vitis x bourquina
Vitis californica
Vitis x champinii
Vitis cinerea
Vitis x doaniana
Vitis girdiana
Vitis labrusca
Vitis x labruscana
Vitis monticola
Vitis mustangensis
Vitis x novae-angliae
Vitis palmata
Vitis riparia
Vitis rotundifolia
Vitis rupestris
Vitis shuttleworthii
Vitis tiliifolia
Vitis vinifera
Vitis vulpina

Ref. Itis 500017

A uga u uva ye una fruita más u menos roncha y sucosa. Ye o fruito d'a vinya u vit y d'a parrera, que forma carrazos.

Morfolochía

Diagrama con as partz d'una uga. Texto en anglés.

As ugas presentan una cubierta impermiable y dura dita barfuello[1] u garafullo que corresponde a lo epicarpo u exocarpo. As ugas son unidas con atras ugas d'o carrazo por a garraspa. A simient que bi ha adintro d'a uga ye a pepita u gran d'uga.[2]

Dimpués de prensar as ugas queda un repui solido formau por as garraspas, os barfuellos y as pepitas y dito brisa.

Emplegos

As pansas son uvas que han estau sozmesas a un proceso de deshidratación.

A més gran parte d'a uga tien lo destín de fer vin, pero bi n'ha unas que se deixan secar pa fer pansas (uvas de colgar), y atras que se minchan dreitament porque son més dulces (uvas lamineras). Dende zaguers d'o sieglo XIX bi ha una tradición de minchar dotze ugas a nueit de cabo d'anyo en Aragón, tota Espanya y buena part d'Hispanoamerica.

O vin se fa sozmetendo a un proceso de fermentación o suco d'a uga u mosto, que tamién se puet consumir y comercializar dreitament como producto no alcoholico.

Pa obtener mosto en muitos puestos a chent pisaba as ugas en un trullar y dimpués las prensaban, pa dimpués[3] recullir o liquido en un laco que bi heba a cantos. Actualment o proceso d'obtener mosto ye un proceso industrializau

En o proceso de fermentación saliban gases que podeban intoxicar a la chent que bi heba amán d'o trullar. Quan o mosto fermenta se diz que "bulle" en aragonés. En as "Cronicas de los Chueces de Teruel" se describe un caso d'intoxicación mientres bulliba o que yera fendo vin:

Esti año al trasmudar de los vinos Francisco Torremocha y Quiteria su mujer baxaron a la bodega quando bullían y se afogaron amos, que ninguno los pudo ayudar.

O vin que se deixa bullir sin o barfuello ye o claret.[3] O vin que se deixa bullir con o barfuello esdevién vin tinto por a difusión d'as substancias colorants que bi ha.

Variedatz

Garnacha, una variedat d'uga común en os vinyals d'Aragón.

En o Semontano de Balbastro y Viello Sobrarbe se cautivan u cautivaban bellas variants d'uga: alcanyón, aramón, garnacha, mamagastro, moristel, parraleta, parrel y salcenyo.

En a compleganza d'o río Martín (comarcas d'o Baixo Martín, Andorra-Sierra d'Arcos y Cuencas Meneras) as variedatz que se produciba yeran: garnacha, migueldiarcos, probetón/probechón, negraleho, royal y blasco (vinya que no puya) y moscatel, cojón de gato y bolsillo como variedatz de parra.[3]

En l'Alto Palancia y Alto Millars se conoixen as variants boval, vernacha/granacha, viradillo, morenillo, direta, temprana, botón de gato/botón de gallo, escatajarra, farcalla, verdiel/vidriel, royal, de teta de vaca, el señorito, de planta, terret, castellana y moscatel.

Referencias

  1. (an) Francho Nagore et al.: Endize de bocables de l'aragonés. Instituto de Estudios Altoaragoneses, Uesca 1999.
  2. (es) Manuel Alvar: Atlas lingüístico y etnográfico de Aragón, Navarra y Rioja. Tomo II. Institución Fernando El Católico. Departamento de Geografía Lingüística Departamento de Geografía Lingüística, Institución Fernando el Católico de la Excma. Diputación Provincial de Zaragoza, 1983
  3. 1 2 3 (es) Luis Miguel Bajén García, Fernando Gabarrús Alquézar: Memoria de los hombres-libro. Guía de la Cultura Popular del Río Martín. Biella Nuei Sociedad Cooperativa, 2002. p 33
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.